Amaal Diary | كيف نحدد أهدافنا لسنة ٢٠١٩

؛

"لا أحد يمنحكِ الحب والحياة غيركِ، ولا أحد يحبكِ كما تحبين ذاتكِ"

مَسَاء/صباح الخير على الجميع 🌸 أتمنى الكل سعيد وبصحة وعافية 💗

اليوم هو أول يوم للسنة الجديده (٢٠١٩) انتهت سنة (٢٠١٨) على خير بنجاحاتها وفشلها و بحلوها ومرها.

هالسنة بإذن الله راح تكون غير بسبب أنك قررتي تخطيط وتحديد أهدافك وطموحاتك لهالسنة!

ليش حلو يكون عندنا اهداف لكل سنه او كل شهر او لكل اسبوع او لكل يوم؟ هالاهداف هذي تخلينا ننجز وننجح ونطمح للأفضل ونكوّن منها أفضل نسخة من أنفسنا.

لما الواحد يكون عنده شغف وإرادة في شيء معين لايمكن من أي شيء وأي شخص وأي ظرف أنه يوقفه عن اهدافه! كل يوم هو يوم جديد وكل يوم جديد هو بداية جديدة 💗

لاتفكري أن الوقت راح على انك تبدأين خططك أو تكملينها .. دام انتي لسى تتنفسين! لسى فيه وقت، ولا تفكرين أن الظروف تحدك من هدفك، هذي كلها اعذار انتي تقوليها لنفسك. ✋🏻

الآن هذي الفتره هي فرصة ذهبية لك بما أننا لسى في أول السنة.. استغليها صح وخططي حياتك مثل ما انتي حابتها!

بالنسبة لنوع الهدف؟ هذا كله يعمد عليك انتي وأيضاً تقدرين فـ كل مجال يكون لك هدف فيه مثلاً ( ديني = التقرب لله من الهدف الفلاني، ذاتي = تطوير الذات من خلال قراءة كتب لتطوير الذات ودخول دورات، تعليمي = أخذ معدلات عالية هالسنة أو ادخل ماستر، جمالي = توحيد لون الجسم أو ترطيب الجسم وتنعيمه أو العناية بالشعر وتطويله، مادي = حفظ ١٠٪ من مصروفي الشهري….. الخ) كثير مجالات، انتي بس عليك انك تفضين كل افكارك واهدافك بشكل مرتب أمامك.

(مافيه عدد معين للأهداف كمان أيضاً مافيه ترتيب لأهمية الاهداف ولاتستخسرين الاهداف الصغيره التافهه بالعكس حطيها بلستتك واستمتعي بانجازها)

الآن بتسألين طيب انا مستعده وأبغى أبدأ أحقق اهدافي وأخطط لها لكن كيف؟

أول شيء مهم جداً أننا نسامح نفسنا على اللي فات سواء فشل في هدف سابق أو عدم وضع اهداف معينة لك! او حتى أي سبب آخر خاص فيك.. شي طبيعي ان الواحد تجيه فترات يفتر فيها او ما ينجع في شيء معين هو حاطه بباله، المشكلة مو بالفشل! المشكله لما ترضخين لفشلك! هنا المفترض انك ترجعين قومين من جديد وتكملين اللي بديتيه..

ثاني شي والأهم هو انك تكوني واثقه بنفسك أنك راح تحققي هذا الهدف ومو شرط بسرعة او بسهوله ولكن في نهاية المطاف انتي راح توصلين للي حاطته ببالك! 👏🏻

ثالث شي وهو التخطيط والبحث .. يعني شرط مهم انك تعملي بحث لأهدافك وكيف تقدرين تحققينها وتعملين لك تخطيطات تساعدك عَلى انك تمشين بالمسار الصح، مثلاً انتي مخططة انو نهاية السنة تجمعين مبلغ من راتبك الشهري وتشترين شي غالي على قلبك وتحبينه أو تستثمرين هذا المبلغ أو تتبرعين فيه أو تهدينه أحد غالي عليك، أياً كان السبب.. الحين كيف نخطط لهالشي؟ نعمل حسبة كم تاخذي من راتبك الشهري و تحطينه بحساب خاص بالبنك أو في خزنة معينه عندك، تعرفين المبلغ الشهري من المبلغ الاساسي اللي تبغين تجمعينه مثلاً ٥ آلاف تقسميها على ١٢ شهر يكون تقريباً كل شهر تأخذين من راتبك ٤٢٠ .. بكذا انتي حطيتي خطة ،

وهنا نوصل للنقطة الرابعة وهي الألتزام .. يعني مو مثلاً كملتي ٣ شهور تأخذين من راتبك و بالشهر الرابع تبغين الفلوس هذي تشترين فيها شي ثاني و ع اساس ببالك بس هالشهر! كذا غلط لأنك من البداية مخططة في حاجة معينه وبترتيب معين، كمان مثلاً تتسلفين من الفلوس اللي مخبيتها ع اساس ترجعينها الشهر اللي بعده! وهكذا.. ،

خامس نقطة وهي الواقعية مثلاً ودك تجمعين في سنه ١٠ الاف وانتي راتبك الف! مايبقى من راتبك الا ٥٠ ريال! هل هذا معقول؟! لا لانه غير واقعي.. مثال آخر وحده هدفها انو نهاية الشهر تنحف ٢٠ كيلو بشكل صحي وماتخسر عضل والخساره تكون كلها دهون .. ببساطة مستحيل لان الجسم مايشتغل بهالطريقة ولو صار وخسرت (كيلوات) راح تخسر عضل وموية و دهون وليس فقط دهون وبكذا راح تتعب بشرتها و جسمها يترهل..

سادس نقطة وهي أستمعي لنفسك ولحدسك وأيضاً ومو لازم الكل يعرف في أهدافك، ممكن البعض يشجعك وممكن البعض الآخر يحبط فيك سواء بنية او غير نية، وممكن البعض يعجل فيك او يقلل من عزيمتك مثل؛ لك شهرين ع الدايت ومانحفتي الا ٧ كيلو؟ كل جسم وطبيعته وهذا الرقم بالمستوى الطبيعي ولكن البعض يحب يتفلسف ويعطيك طاقة سلبية انتي مو محتاجتها! وغيرها أمور كثير مثل ان البعض ممكن مايبغاك أحسن منه ف يقلل من قيمة هدفك وهكذا..

سابع نقطة وهي كثرة الاهداف وترتيبها مثلاً انا عندي أهداف كثيره بس مو عارفة من وين ابدأ وبأي هدف أول؟! ،، الجواب : رتبي أهدافك على حسب الأهمية عندك من الأهم فالمهم فالأقل أهمية ودائماً أنصحكم بأن تبدأون بهدف واحد فقط الى أن توصلون للهدف! بعدها تنتقلون للهدف الثاني وهكذا 🌸

،

،

وهذي هي النقاط المهمة في الوصول لأهدافك 💗

أتمنى أن الموضوع نال على أعجابكم وأفادكم 👍🏻🌸

في أمان الله

#فلسفةآمال